عود الثمام ذابل ( لبدر بن عبد المحسن )

عود الثمام ذابل
ومتعرج ٍ ظله على الحصا والرمل
وتحت سيقانه سيل مضى وأحـل
وبيت هجره النمل
لطيورها كانت ملاعب...
أطرافها العيدان..
جاها السموم اللاهب...
وحــّرق الجــــنحان..

القلب ينضح بالولــه والربع خــالي
وأوطان مرت في العمر والا ليالي

ما للصحاري فتون... ان غابت اثار الظبا
عــنها العــروق
والناقة المزيون... في عــيونها جمر خبا
وسنامها محروق

عود الثمام عودي... جف وبراه الشـوق
ربي يا معبودي... تجعل ظلامي بروق

القلب ينضح بالوله والــربع خــالي
وأوطان مرت في العمر وإلا ليالي

اقبل على الســِّيف وجلس...
يخط في الرمل بعصاه
وخــذا من الغربي نفس...
ريحة زهر نجد فـهواه

في القلب جمر ٍ يالرياض... ذكرك يشبه
ومحد ٍ عرف عشق الرياض... إلا نشبه
يجيك غصب ٍ يالرياض... وصادق محبه

يا فــالق الــمـــحــار .... لاتــجـــيب لي دانــه
جب للغريب اخبار .... وش سوت أوطانه
جــينا نبي الأرزاق
وشبنا تعب وفـراق
راح العمر ( وطراد ) نســيوه خلانه

هواجسه مثل الهبوب....تسكن لها ساعة وتهيج
ومراكب تبحر جنوب.... تدوّر كــنوز بالخـــليج

بالحيل كنزي يالرياض...صــخرك وطينك
وماشوف عزي يالرياض... الا فجــبينك
قلبي يسارك يالرياض... وروحي يمينك

صوت النوارس غاب ...
طير و رحل لأرضة
وفل الجناح عقاب ...
وداعتك يا طير
لا من رجعت بخير
جب للغريب تراب...
من الوطن وأرضة

،،،
مما استعذبته هذا الصباح لبدر بن عبدالمحســـن
،،،
أحسن الله إليه و إلينا